Эмээ гэж дуудуулах
Энхрий зээ ачтай хүн би
Эрхэм оюундаа гэгээрэл эрдэм сурах
Энгийн нэгэн иргэн би
Зууны тал босгыг аль хэдийн давсан ч
Зуунтай учирсан юм шиг хуучрахгүй, хө
Залуу зандан насандаа
Золбоолог жавхаатай алхдаг шигээ
Зүрхэндээ залуу байдаг зангаа
Зүгээр л нэг хэвээр нь орхиё доо
Уруулаа будаж, өнгө өнгийн даашинз
Өндөр өсгийт өмсөж урамтай гунхая
Өдөр хоногтой уралдан дэвшиж
Өөртөө хайртай өөдрөг найз нартайгаа
Дурсамжаа хуваалцан дугуй ширээнд хамт
Дуртай үедээ баясан сууж, дуулж бүжиглэе
Дурсгалтай газруудаар аялаж нүдээ хужирлан
Дуржигнуулан ярих богц дүүрэн сонинтой
Хөгжилтэй сайхан хэдэн андтайгаа
Хөхрөн баясан алжаалаа тайлая
Нас ахиж нам суусан гээд
Нарлаг хорвоогийн өдрүүд ирдгээрээ л ирнэ, хө
Гэр бүлтэйгээ хайр халамжаар дүүрэн
Гэрэлт орчлонд гялалзаж амьдрая
Гэнэн залуу нас аль хэдийн шударсан
Гэмгүй дээ хө, өөрөөсөө бүү харамла
Өнгөтөй орчлонд өнгөлөг
Өтөлсөн ч өөрөөрөө л амьдарая
Цаг хугацааны тоо л өөрчлөгдөн хувьсана
Цар амьдрал өөрчлөгдөхгүй дээ, хө
Нас бол тоо, тоо жил ирэх тусам нэмэгднэ
Нахилзаж амьдрахдаа биеэ л хайрлая
Намрын навч унаж газартаа шингэдэг шиг
Нарт ертөнцөд нэг л өдөр буцна
Хоног тоолоод хэрэггүй дээ, хө
Хорвоод үлдсэн амьралаа
Жаргалаар дүүрэн сэтгэл хангалуун
Жавхаатай баясаж үдье дээ, хө
С.Үзмээ 01.01.2021
No comments:
Post a Comment